‘പ്രളയാനന്തര കേരളം’ സാക്ഷരതാമിഷന്‍ -സര്‍വേയില്‍ ഞെട്ടിക്കുന്ന വിവരങ്ങള്‍

എമര്‍ജന്‍സി കിറ്റോ ? – അതെന്താ ?- 66.77 %
ചുഴലിക്കാറ്റ് പ്രകൃതി ദുരന്തമോ ? – 91.57 %

പ്രളയാനന്തര കേരളത്തെക്കുറിച്ച് ജനങ്ങളുടെ മനസ്സറിയാന്‍ സാക്ഷരതാമിഷന്‍ നടത്തിയ സര്‍വേയില്‍ ഞെട്ടിപ്പിക്കുന്ന വിവരങ്ങള്‍. സര്‍വേയോട് പ്രതികരിച്ച ഭൂരിഭാഗം പേര്‍ക്കും ദുരന്തങ്ങളെക്കുറിച്ചോ മന്‍കരുതലുകളെ സംബന്ധിച്ചോ ധാരണയില്ല.ദുരന്തങ്ങള്‍ ഉണ്ടാകുമ്പോള്‍ സ്വയം രക്ഷയ്ക്കുള്ള അടിയന്തിരസാമഗ്രികള്‍ ഉള്‍പ്പെടുന്ന എമര്‍ജനസി കിറ്റിനെക്കുറിച്ച് കേട്ടിട്ടുപോലുമില്ലാത്തവരാണ് 66.77 ശതമാനവും. സര്‍വേയുടെ വിശദമായ റിപ്പോര്‍ട്ട് സാക്ഷരതാമിഷന്‍ ഡയറക്ടര്‍ ഡോ.പി.എസ്.ശീകല, മുഖ്യമന്ത്രി പിണറായി വിജയന് സമര്‍പ്പിച്ചു. മന്ത്രിമാരായ പ്രൊഫ.സി.രവീന്ദ്രനാഥ്, കടകംപള്ളി സുരേന്ദ്രന്‍, ഡിസാസ്റ്റര്‍ മാനേജ്മെന്‍റ് അതോറിറ്റി മെമ്പര്‍ സെക്രട്ടറി ഡോ.ശേഖര്‍ കുര്യാക്കോസ് എന്നിവര്‍ സന്നിഹിതരായിരുന്നു.

സംസ്ഥാനത്തെ മുഴുവന്‍ ജില്ലകളിലായി ആകെ 2,91048 വീടുകളിലാണ് സര്‍വേ നടത്തിയത്. പട്ടികജാതി വിഭാഗത്തിലുള്ളവരുടെ 41052 വീടുകളിലും പട്ടികവര്‍ഗ വിഭാഗക്കാരുടെ 5042 വീടുകളും ഇതില്‍ ഉള്‍പ്പെടുന്നു. ഒരു വീട്ടില്‍ ഒരാള്‍ എന്ന രീതിയിലായിരുന്നു സര്‍വേ. പ്രതികരിച്ചവരില്‍ 1,55906 പേര്‍ സ്ത്രീകളാണ്. 38 ട്രാന്‍സ്ജെന്‍ഡറുകളില്‍ നിന്നും പ്രതികരണം രേഖപ്പെടുത്തി. ഗ്രാമപഞ്ചായത്തുകള്‍ 941, മുനിസിപ്പാലിറ്റികള്‍ 87, കോര്‍പറേഷനുകള്‍ 6 എന്നിങ്ങനെയാണ് സര്‍വേ നടത്തിയ തദ്ദേശസ്വയംഭരണ സ്ഥാപനങ്ങളുടെ വിവരം. സാക്ഷരതാമിഷന്‍റെ 712 തുല്യതാ പഠനകേന്ദ്രങ്ങളിലെ 68038 പഠിതാക്കള്‍ സര്‍വേ വൊളന്‍റീയര്‍മാരായി. ഇതില്‍ 39680 പേര്‍ സ്ത്രീകളാണ്. ട്രാന്‍സ്ജെന്‍ഡറുകള്‍ 34.

വരള്‍ച്ച, വെള്ളപ്പൊക്കം, ചുഴലിക്കാറ്റ്, ഭൂമികുലുക്കം എന്നീ ദുരന്തങ്ങളെക്കുറച്ച് അറിയാവുന്ന വിവരങ്ങള്‍ പറയാമോ എന്ന ചോദ്യത്തിന് മതിയായ വിവരങ്ങള്‍ നല്‍കിയത് 43.74 ശതമാനം. 56.26 ശതമാനം ജനങ്ങള്‍ക്ക് ഇവയെക്കുറിച്ച് വ്യക്തമായ ധാരണയില്ല. ചുഴലിക്കാറ്റ് പ്രകൃതി ദുരന്തമാണെന്ന് അറിയാവുന്നത് 8.43 ശതമാനം മാത്രം. സര്‍വേയോട് പ്രതികരിച്ച 91. 57 ശതമാനം പേര്‍ക്കും ഇക്കാര്യത്തില്‍ ധാരണയില്ല. പ്രകൃതി ദുരന്തമുണ്ടായാല്‍ സ്വീകരിക്കേണ്ട മുന്‍കരുതലുകളെക്കുറിച്ച് അറിയാത്തവരാണ് 41.86 ശതമാനവും. കാലാവസ്ഥ വ്യതിയാനത്തെക്കുറിച്ച് കേട്ടിട്ടില്ലാത്തവര്‍ 20.02 ശതമാനം. പ്രളയാനന്തരം പടര്‍ന്ന് പിടിക്കുന്ന രോഗങ്ങളെക്കുറിച്ച് 17.15 ശതമാനം പേര്‍ക്ക് അറിയില്ല. ആദിവാസി- തീരദേശമേഖലകളിലും പട്ടികജാതി- നഗരചേരി പ്രദേശങ്ങളിലുമുള്ളവരില്‍ ഭൂരിഭാഗവുമാണ് ഇക്കാര്യത്തില്‍ തങ്ങളുടെ അജ്ഞത അറിയിച്ചത്.

ദുരന്തമുണ്ടാകുന്ന സന്ദര്‍ഭങ്ങളില്‍ അപകടങ്ങള്‍ വര്‍ധിപ്പിക്കുന്നതിന് ഓണ്‍ ചെയ്തിട്ടിരിക്കുന്ന ഗ്യാസ് സിലിണ്ടറും മൊബൈല്‍ ചാര്‍ജ് ചെയ്യാത്തപ്പോഴും ഓണാക്കിയിടുന്ന ചാര്‍ജറും കാരണമാകാറുണ്ടെന്ന് ദുരന്തനിവാരണ പ്രവര്‍ത്തനമേഖലയിലെ വിദഗ്ധര്‍ അഭിപ്രായപ്പെട്ടിരുന്നു. സര്‍വേയില്‍ അഭിപ്രായം അറിയിച്ച 22.04 പേരും ഗ്യാസ് സിലിണ്ടര്‍ ഓഫാക്കാതെ പുറത്തുപോകുന്നവരാണ്. ഫോണ്‍ ചാര്‍ജ് ചെയ്യാത്തപ്പോഴും ചാര്‍ജര്‍ ഓണാക്കിയിടുന്നവര്‍ 49.17 ശതമാനം പേരാണ്.

പ്രളയത്തെക്കറിച്ച് 59.48 ശതമാനം അറിഞ്ഞത് ടെലിവിഷനിലൂടെയാണ്. 15.88 ശമാനം പേര്‍ പത്രങ്ങളിലൂടെയും. സോഷ്യല്‍ മീഡിയ അടക്കമുള്ള ഇന്‍റര്‍നെറ്റ് സൗകര്യങ്ങളിലൂടെ ഇക്കാര്യം അറിഞ്ഞത് 11.13 ശതമാനമാണ്. അതായത്, ആകെ സര്‍വേ ചെയ്തവരില്‍ 86.49 ശതമാനം പേരും ടെലിവിഷന്‍, ഇന്‍റര്‍നെറ്റ്, പത്രം എന്നിവയിലൂടെയാണ് പ്രളയവിവരങ്ങള്‍ മനസ്സിലാക്കിയത്. ദുരന്തനിവാരണ പ്രവര്‍ത്തനങ്ങള്‍ക്കും ബോധവല്‍ക്കരണ പ്രവര്‍ത്തനങ്ങള്‍ക്കും ഈ മാധ്യമങ്ങളുടെ സാധ്യത കൂടുതല്‍ പ്രയോജനപ്പെടുത്താന്‍ കഴിയുമെന്നാണ് ഇതില്‍ നിന്നും വ്യക്തമാകുന്നത്.

പ്ലാസ്റ്റിക് മാലിന്യ സംസ്കരണത്തെക്കുറിച്ചും സമൂഹത്തില്‍ തെറ്റായ ധാരണകള്‍ നിലനില്‍ക്കുന്നുണ്ടെന്ന് സര്‍വേ ഫലം വ്യക്തമാക്കുന്നു. 38.76 ശതമാനം പേരും പ്ലാസ്റ്റിക് കത്തിച്ചുകളയുകയാണ്. ഇതുമൂലമുണ്ടാകുന്ന ആരോഗ്യപ്രശ്നങ്ങളെക്കുറിച്ച് വ്യക്തമായ അറിവ് ഇവര്‍ക്കില്ല. പ്ലാസ്റ്റിക് മാലിന്യങ്ങള്‍ വീട്ടില്‍ കൂട്ടിവെയ്ക്കുകയും അവിടെ തന്നെ നിക്ഷേപിക്കുകയും ചെയ്യുന്നവര്‍ 34.47 ശതമാനമാണ്. പൊതുമാലിന്യത്തോടൊപ്പം നിക്ഷേപിക്കുന്നവര്‍ 26.77 ശതമാനമാണ്. പരിസ്ഥിതി സൗഹാര്‍ദ ജീവിതത്തിന് ഉറവിട മാലിന്യസംസ്കരണം ശീലമാക്കിയിട്ടുണ്ടോ എന്ന ചോദ്യത്തിന് ഉണ്ട് എന്ന് 65.61 ശതമാനം പേരും ഇല്ലായെന്ന് 34.39 ശതമാനം പേരും അഭിപ്രായപ്പെട്ടു.

പ്രകൃതി ദുരന്തത്തെക്കുറിച്ചുള്ള ബോധവല്‍ക്കരണ പരിപാടിയില്‍ പങ്കാളികളാകാന്‍ സന്നദ്ധരാണെന്ന് 86 ശതമാനം പേര്‍ അറിയിച്ചു. നവകേരള നിര്‍മാണത്തിനും ദുരന്തനിവാരണ പ്രവര്‍ത്തനങ്ങള്‍ക്കും ഇത് വലിയ പ്രതീക്ഷയാണ് നല്‍കുന്നത്. ബോധവല്‍ക്കരണ പ്രവര്‍ത്തനങ്ങള്‍ക്ക് പ്രാദേശിക കൂട്ടായ്മകള്‍ ഉണ്ടാവണമെന്ന് 44.74 ശതമാനം അഭിപ്രായപ്പെട്ടു. ദുരന്തനിവാരണ പ്രവര്‍ത്തനങ്ങളെക്കുറിച്ച് പാഠ്യപദ്ധതിയില്‍ ഉള്‍പ്പെടുത്തണമെന്ന് 20.46 ശതമാനം പേര്‍ അഭിപ്രായപ്പെട്ടു. ദുരന്തപ്രതിരോധ മാര്‍ഗങ്ങള്‍ പാലിക്കാന്‍ സര്‍ക്കാരിനും തദ്ദേശസ്വയംഭരണ സ്ഥാപനങ്ങള്‍ക്കും ഉത്തരവാദിത്തം ഉണ്ടെന്ന് 50.82 ശതമാനം പേര്‍ അറിയിച്ചു.

ദുരിതാശ്വാസ പ്രവര്‍ത്തനങ്ങളില്‍ 96.28 ശതമാനം പേര്‍ പങ്കെടുത്തു. 34.98 ശതമാനം പേര്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തു. 18.94 ശതമാനം പേര്‍ രക്ഷാപ്രവര്‍ത്തനങ്ങളില്‍ പങ്കെടുത്തു. ഇതെല്ലാം ചെയ്ത 7.58 ശതമാനം പേരുണ്ട്.

സര്‍വേയില്‍ കണ്ടെത്തിയ വിവരങ്ങളുടെ അടിസ്ഥാനത്തില്‍ സാക്ഷരതാമിഷന്‍ സര്‍ക്കാരിന് സമര്‍പ്പിക്കുന്ന ശുപാര്‍ശകള്‍ ഇപ്രകാരമാണ്:

1) അക്കാദമിക് മേഖല

നവകേരള സൃഷ്ടിയുടെ ഭാഗമായി സംസ്ഥാനത്ത് ദുരന്തനിവാരണ സാക്ഷരതാപദ്ധതി ആവിഷ്കരിച്ച് നടപ്പാക്കുക. സംസ്ഥാനത്ത് പൊതുവിദ്യാഭ്യാസത്തിന്‍റെ ഭാഗമായി ദുരന്തനിവാരണ പ്രവര്‍ത്തനങ്ങള്‍, കാലാവസ്ഥാ വ്യതിയാനം ഉണ്ടാകുന്നിതിനുള്ള കാരണങ്ങള്‍ അവയുടെ പ്രതിരോധ മാര്‍ഗങ്ങള്‍ എന്നിവ പാഠ്യപദ്ധതിയില്‍ ഉള്‍പ്പെടുത്തുക.

അനൗപചാരിക വിദ്യാഭ്യാസ പ്രവര്‍ത്തനങ്ങളുടെ ഭാഗമായി കേരള സംസ്ഥാന സാക്ഷരതാമിഷന്‍ അതോറിപ്പി നടപ്പാക്കിവരുന്ന സാക്ഷരതാ തുല്യതാ കോഴ്സികളുടെ പാഠ്യപദ്ധതിയില്‍ ദുരന്തനിവാരണ പ്രവര്‍ത്തനങ്ങളൈയും കാലാവസ്ഥാ വ്യതിയാനം ഉണ്ടാകുന്നതിനുള്ള കാരണങ്ങളൈയും അവ പ്രതിരോധിക്കാനുള്ള മാര്‍ഗങ്ങളെയും ഉള്‍പ്പെടുത്തുക.

ദുരന്തനിവാരണ പ്രവര്‍ത്തനങ്ങളെക്കുറിച്ച് ലഘുപുസ്തകങ്ങള്‍ പ്രസിദ്ധീകരിക്കുക.

ദുരന്തനിവാരണ പ്രവര്‍ത്തനങ്ങളെക്കുറിച്ച് ബഹുജന വിദ്യാഭ്യാസ പ്രവര്‍ത്തനങ്ങള്‍ നടത്തുന്നതിന് ഡിജിറ്റല്‍ പഠനസാമഗ്രികള്‍ തയ്യാറാക്കുയും ജനകീയ വിദ്യാഭ്യാസ പ്രവര്‍ത്തനങ്ങള്‍ ആരംഭിക്കുകയും ചെയ്യുക. ഇതിനായി സാക്ഷരതാമിഷന്‍റെ സംഘടനാസംവിധാനം പ്രയോജനപ്പെടുത്തുക.

2) ജനകീയ പ്രവര്‍ത്തനങ്ങള്‍

ദുരന്തനിവാരണ അതോറിറ്റിയും സാക്ഷരതാമിഷനും ചേര്‍ന്ന് സാക്ഷരതാവിദ്യാഭ്യാസ പ്രവര്‍ത്തകര്‍ക്കും പഠിതാക്കള്‍ക്കും ദുരന്തനിവാരണ പ്രവര്‍ത്തനങ്ങളെക്കുറിച്ച് പരിശീലനം നല്‍കുക. ഇതിനായി പ്രത്യേക സ്കീം ആരംഭിക്കുക.
ദുരന്ത നിവാരണ പ്രവര്‍ത്തനങ്ങളെ ശക്തിപ്പെടുത്തുന്നതിന് ജില്ലാതലത്തില്‍ അക്കാദമിക് റിസോഴ്സ് ഗ്രൂപ്പ് രൂപീകരിക്കുക.
ജനപ്രതിനിധികള്‍, സാമൂഹ്യസന്നദ്ധ പ്രവര്‍ത്തകര്‍ തുടങ്ങിയവര്‍ക്ക് പരിശീലനം നല്‍കുക.
എല്ലാ തദ്ദേശസ്വയംഭരണ സ്ഥാപനങ്ങളിലും ദുരന്ത പ്രതിരോധ ജനകീയ പാഠശാലകള്‍ സംഘടിപ്പിക്കുക.
എല്ലാ വാര്‍ഡുകളിലും വിവിധ സര്‍ക്കാര്‍- സര്‍ക്കാരിതര ഏജന്‍സികളുടെ സഹായത്തോടെ ദുരന്ത പ്രതിരോധ കര്‍മസേനകള്‍ രൂപീകരിക്കുക.
ആദിവാസി മേഖല, പട്ടികജാതി കോളനികള്‍, തീരദേശമേഖലകള്‍, ട്രാന്‍സ്ജെന്‍ഡേഴ്സ്, സ്ത്രീകള്‍, ശരീരിക-മാനസിക വെല്ലുവിളികള്‍ നേരിടുന്നവര്‍ തുടങ്ങിയ പാര്‍ശ്വവത്കൃത വിഭാഗങ്ങള്‍ക്കിടയില്‍ ദുരന്ത നിവാരണ പ്രവര്‍ത്തനങ്ങളെക്കുറിച്ച് ബോധവല്‍ക്കരണം നല്‍കുന്നതിന് പ്രത്യക പദ്ധതി ആവിഷ്കരിക്കുക
ദുരന്തനിവാരണ അതോറിറ്റിയുടെ പ്രസിദ്ധീകരണങ്ങള്‍, ലഘുലേഖകള്‍ തുടങ്ങിയവ സാക്ഷരതാമിഷന്‍റെ വിദ്യാകേന്ദ്രങ്ങള്‍ മുഖേന ജനങ്ങളിലെത്തിക്കുക

3) വിവിധ വകുപ്പുകളുടെ ഏകോപനം

ദുരന്തനിവാരണ അതോറിറ്റി, കേരള സംസ്ഥാന സാക്ഷരതാമിഷന്‍ അതോറിറ്റി, ഹരിതകേരളം മിഷന്‍, കാലാവസ്ഥാ വ്യതിയാന നിരീക്ഷണവകുപ്പ്, കുടുംബശ്രീ തുടങ്ങിയ വിവിധ സര്‍ക്കാര്‍ ഏജന്‍സികളുടെ ഏകോപനം ദുരന്തനിവാരണ പ്രവര്‍ത്തനങ്ങള്‍ക്കായി പ്രാദേശിക തലത്തില്‍ സാധ്യമാക്കുക, ഇതിനായി സാക്ഷരതാമിഷന്‍റെ പ്രാദേശികതലംവരെയുള്ള സംഘടനാസംവിധാനം പ്രയോജനപ്പെടുത്തുക
ദുരന്തനിവാരണ സാക്ഷരതാപദ്ധതികള്‍ക്കായി തദ്ദേശസ്വയംഭരണ സ്ഥാപനങ്ങള്‍ വാര്‍ഷിക പദ്ധതി പ്രകാരം പ്രോജക്ടുകള്‍ വയ്ക്കുകയും ജനകീയ സംരംഭമായി നടപ്പാക്കുകയും ചെയ്യുക.