കൊച്ചി: മലയാളികളില്‍ പലരും മലയാളത്തെ ഉപേക്ഷിക്കുമ്പോള്‍ എണ്‍പതുകാരിയായ ഓസ്‌ട്രേലിയക്കാരി കാതറിന്‍, നമ്മുടെ ഭാഷയെയും സംസ്‌കാരത്തെയും കുറിച്ചു പഠിക്കാന്‍ വേണ്ടി മാത്രം കേരളത്തില്‍ കഴിയുന്നു. കഴിഞ്ഞ 2019 ജനുവരി മുതല്‍ മൂന്നു മാസം അവര്‍ കേരളത്തിലുണ്ടായിരുന്നു. വിസയുടെ കാലാവധി കഴിഞ്ഞതിനാല്‍ പിന്നെ സിങ്കപ്പൂരില്‍ മകന്റെയടുത്തേക്കു പോയി. വൈകാതെ വിസ പുതുക്കി മടങ്ങിയെത്തി. മലയാളം പഠിച്ചെടുക്കാന്‍ വേണ്ടി മാത്രം.
ആയുര്‍വേദ ചികിത്സയ്ക്ക് കേരളത്തിലെത്തിയതാണവര്‍, തന്റെ നാട്ടിലെ യാത്രാ സംഘത്തോടൊപ്പം ചികിത്സ കഴിഞ്ഞ് ചെറായി ബീച്ച് കാണാന്‍ വന്നു. അതിനകം ആയര്‍വേദവും കേരളത്തിന്റെ കലയും സംസ്‌കാരവും കേരളത്തിലെ കുടുംബ ജീവിതവുമൊക്കെ അവരെ ആകര്‍ഷിച്ചിരുന്നു. 20 വര്‍ഷമായി സാക്ഷരതാ മിഷന്റെ പ്രേരക് ആയി പ്രവര്‍ത്തിക്കുന്ന ചെറായി കണ്ണാത്തിശ്ശേരി കെ.ബി. രാജീവിന്റെ വീട്ടില്‍ അദ്ദേഹത്തിന്റെ കുടുംബാംഗങ്ങളോടൊപ്പമായിരുന്നു താമസം. മലയാളം പഠിച്ചാലേ സംസ്‌കാരത്തെ പൂര്‍ണമായും മനസ്സിലാക്കാനാവൂ എന്ന പക്ഷക്കാരിയായ കാതറിന്‍, രാജീവ് ഭാഷ പഠിപ്പിക്കുന്നയാളാണാണെന്നു മനസ്സിലായതോടെ അദ്ദേഹത്തിന്റെ സഹായം തേടുകയായിരുന്നു. അങ്ങനെ കാതറിന്‍ സാക്ഷരതാ മിഷനില്‍ പേര്‍ രജിസ്റ്റര്‍ ചെയ്തു മലയാള പഠനം തുടങ്ങി.
ഇപ്പോള്‍ അക്ഷരങ്ങള്‍ വായിക്കാനും എഴുതാനും നന്നായറിയാം. വാക്കുകളും അര്‍ത്ഥവും പഠിക്കാനുള്ള യത്‌നമാണ് അടുത്തത്. രാവിലെയും വൈകുന്നേരവും എഴുതിയും വായിച്ചും പരിശീലനം. അതിനു വല്ലാത്തൊരാവേശമാണ്. ഇതോടൊപ്പം വീട്ടില്‍ നിത്യം ഉപയോഗിക്കുന്ന മലയാള പദങ്ങള്‍ അര്‍ഥം ചോദിച്ചു മനസ്സിലാക്കി പ്രയോഗിക്കുന്നുമുണ്ട്. വീട്ടില്‍ മറ്റുള്ളവര്‍ പറയുന്നതുപോലെ ‘എനിക്ക് ചായ വേണം’ എന്നു മലയാളത്തില്‍ തന്നെയാണവര്‍ പറയുന്നത്.
യാത്രകള്‍ക്കിടയില്‍ ശ്രീനാരായണ ഗുരുദേവന്റെ പ്രതിമകള്‍ കണ്ട് അന്വേഷിച്ച കാതറിന്‍ പിന്നെ ഇന്റര്‍നെറ്റ് പരതി ഗുരുദേവന്റെ ജീവിതത്തെയും ആശയത്തെയും കുറിച്ച് അറിഞ്ഞു. ശിവഗിരിയില്‍ പോകണമെന്ന ആഗ്രഹത്തിലാണിപ്പോള്‍. കേരളീയ വസത്രങ്ങള്‍ ധരിക്കാനും കേരളീയ ഭക്ഷണം കഴിക്കാനുമാണിഷ്ടം.
കൈ കൊണ്ട് ആഹാരം കഴിക്കാന്‍ തുടങ്ങിയപ്പോള്‍ രണ്ടു ദിവസം ബുദ്ധിമുട്ടായിരുന്നു. ഇപ്പോള്‍ അനായാസം ചെയ്യുന്നു. ”മലയാളത്തെയും മലയാളികളെയും ഈ സംസ്‌കാരത്തെയും അറിയണം. ഇടയ്ക്ക് നാട്ടില്‍ പോകേണ്ടി വന്നാലും ഞാന്‍ വീണ്ടും വരും, അതറിയാനായി” – കാതറിന്‍ പറയുന്നു
- ' AKSHARAM '
Near Pettah Govt.Boys Higher Secondary School
Pettah P.O, Trivandrum 695024
- 0471 - 2472254
email: info.kslma@kerala.gov.in
stateliteracymission@gmail.com
മലയാളം പഠിക്കാന്‍ കാതറിനെത്തി; ഓസ്‌ട്രേലിയയില്‍ നിന്നും
10 - ജൂലൈ , 2019