കാവ്യസൂര്യന്റെ ദീപ്തസ്മരണയില്‍ ചരിത്രരേഖ സര്‍വേ തുടങ്ങി

തിരുവനന്തപുരം: കൈരളി ആശ്രുബിന്ദുക്കളാല്‍ ഉദകംപകര്‍ന്ന് പ്രണമിച്ച കാവ്യസൂര്യന്റെ ഓര്‍മകള്‍ക്ക് സാക്ഷരതാമിഷനിലൂടെ വീണ്ടും പുനര്‍ജ്ജനി. സംസ്ഥാനത്ത് പുരാരേഖ ശേഖരണവും പരിപാലനവും വിപുലമാക്കുന്നതിന്റെ ഭാഗമായി പുരാരേഖ വകുപ്പുമായി സഹകരിച്ച് സാക്ഷരതാമിഷന്റെ നേതൃത്വത്തിലുള്ള ചരിത്രരേഖ സര്‍വേക്ക് മലയാളത്തിന്റെ പ്രിയ കവി ഒ.എന്‍.വി.കുറിപ്പിന്റെ വഴുതക്കാട്ടെ വസതിയായ ഇന്ദീവരത്തില്‍ നിന്ന് തുടക്കമായി. ഒ.എന്‍.വി കുറുപ്പിന്റെയും അദ്ദേഹത്തിന്റെ പിതാവിന്റെയും ആദ്യകാല കൈയെഴുത്ത് പ്രതികള്‍ അദ്ദേഹത്തിന്റെ ഭാര്യ സരോജിനിയില്‍ നിന്നും മന്ത്രിമാരായ സി.രവീന്ദ്രനാഥ്, രാമചന്ദ്രന്‍ കടന്നപ്പള്ളി എന്നിവര്‍ ഏറ്റവുവാങ്ങിയായിരുന്നു സാക്ഷരതാമിഷന്റെ 70,000 പഠിതാക്കളിലൂടെ (പത്താംതരം, ഹയര്‍സെക്കന്‍ഡറി) സംസ്ഥാനവ്യാപകമായി നടത്തുന്ന സര്‍വേക്ക് തുടക്കം കുറിച്ചത്.
കവി ഒ.എന്‍.വി കുറുപ്പിന്റെ ജന്മദിനമായ 1931 മെയ് 27ന് അദ്ദേഹത്തിന്റെ പിതാവും കൊല്ലം ഒറ്റപ്ലാക്കല്‍ കുടുംബത്തിലെ അംഗവും പ്രജാസഭ അംഗവുമായ ഒ.എന്‍.കൃഷ്ണക്കുറുപ്പ് എഴുതിയ ഡയറി, 1951-52 കാലഘട്ടങ്ങളില്‍ ഒ.എന്‍.വി ബി.എക്കു പഠിച്ചിരുന്നപ്പോള്‍ വായിച്ചിരുന്ന ടാഗൂറിന്റെ കഥാസമാഹാര പുസ്തകത്തില്‍ ആദ്യമായി ഇംഗ്ലീഷില്‍ അടയാളപ്പെടുത്തിയ അദ്ദേഹത്തിന്റെ കയ്യൊപ്പ്. 74- ല്‍ അദ്ദേഹം രചിച്ച കറുത്തപക്ഷിയുടെ പാട്ട് എന്ന കവിതയുടെ കയ്യെഴുത്ത് പ്രതി എന്നീ രേഖകളാണ് കൈമാറിയത്. വിവരങ്ങള്‍ മന്ത്രി സി.രവീന്ദ്രനാഥ് സര്‍വേ ഫോറത്തില്‍ രേഖപ്പെടുത്തി.
കൈമാറിയ രേഖകളെക്കുറിച്ച് സരോജിനിയും മകന്‍ രാജീവും വിശദീകരിച്ചു. 1931 മെയ് 27ന് ഒ.എന്‍.കൃഷ്ണക്കുറിപ്പെഴുതിയ ഡയറിയെക്കുറിച്ച് പറഞ്ഞപ്പോള്‍ സരോജിനി വികാരാധീനയായി. ആ ദിനത്തിന്റെ മഹത്വം അത്രക്കാണ്. കൃഷ്ണക്കുറുപ്പിന് ഏറെ ആരാധ്യനായ ജവഹര്‍ലാല്‍ നെഹ്‌റുവിന്റെ സന്ദര്‍ശനവും ഒ.എന്‍.വിയുടെ ജന്മദിനവും ആകസ്മികമായി ഒത്തുചേര്‍ന്ന ദിവസം. ‘ഒരു സുദിനം’ എന്നാണ് 1931 മെയ് 27നെ കൃഷ്ണക്കുറുപ്പ് ഡയറിയില്‍ രേഖപ്പെടുത്തിയത്. ജവഹര്‍ലാല്‍ നെഹ്‌റുവും കുടുംബവും കൊല്ലത്തെത്തിയപ്പോള്‍ മുനിസിപ്പല്‍ കൗണ്‍സിലറായിരുന്ന കൃഷ്ണക്കുറുപ്പിന്റെ നേതൃത്വത്തിലായിരുന്നു സ്വീകരണം നല്‍കിയത്. അതിനുശേഷം വീട്ടിലേക്കെത്തിയപ്പോഴാണ് അറിഞ്ഞത് ഭാര്യ കെ.ലക്ഷ്മിക്കുട്ടിയമ്മ ഒരു ആണ്‍കുഞ്ഞിനെ പ്രസവിച്ചുവെന്ന്. അതുകൊണ്ടാണ് ഡയറിയില്‍ ആ ദിനത്തെ കൃഷ്ണക്കുറുപ്പ് സുദിനമെന്ന് വിശേഷിപ്പിച്ചതെന്ന് സരോജിനി പറഞ്ഞു.
ഒട്ടേറ ചരിത്രസ്മാരകങ്ങളും ചരിത്രരേഖകളും കേരളത്തിലുണ്ടെങ്കിലും ഭൂരിഭാഗവും പൊതുസമൂഹത്തില്‍ നിന്നും വിസ്മൃതിയിലായ സാഹചര്യമാണുള്ളതെന്ന് മന്ത്രി സി.രവീന്ദ്രനാഥ് പറഞ്ഞു. അവ കണ്ടെത്തുന്നതിനും സംരക്ഷിക്കുന്നതിനുമായാണ് ചരിത്രരേഖ സര്‍വേ നടത്തുന്നത്. കേവലം അക്ഷരജ്ഞാനത്തിനുപരി സംസ്ഥാനത്ത് പുതിയൊരു സാക്ഷരതാ സമ്പ്രദായത്തിന് തുടക്കം കുറിക്കുന്നതിന്റെ ആദ്യപടിയാണ് ചരിത്രരേഖ സര്‍വേ. മറ്റു പലമേഖലകളുമായി ബന്ധപ്പെടുത്തി സാക്ഷരതാ പ്രവര്‍ത്തനത്തെ കൂടുതല്‍ വിപുലമാക്കനാണ് ലക്ഷ്യമിടുന്നത്. ഉദാത്തമായ കേരള സംസ്‌കൃതിക്ക് ഉപോത്ബലകങ്ങളായ നിരവധി ചരിത്രരേഖകളും സ്മാരകങ്ങളും ഇനിയും കണ്ടെത്തേണ്ടതുണ്ട്. അവ കണ്ടെത്തി സൂക്ഷിക്കുകയെന്ന ദൗത്യമാണ് ചരിത്രരേഖ സര്‍വേയിലൂടെ ലക്ഷ്യമിടുന്നത്. സാക്ഷര കേരളത്തിന് ചൈതന്യമായി സാക്ഷരതാമിഷന്‍ പ്രവര്‍ത്തിക്കുന്നതില്‍ അഭിമാനമുണ്ടെന്നും മന്ത്രി പറഞ്ഞു. സാക്ഷരതാമിഷന്‍ നടത്തിവരുന്ന പ്രവര്‍ത്തനങ്ങള്‍ക്ക് എല്ലാവിധ സഹകരണങ്ങളും നല്‍കുമെന്ന് പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി പറഞ്ഞു.
സംസ്ഥാനസാക്ഷരതാമിഷന്‍ ഡയറക്ടര്‍ ഡോ.പി.എസ്.ശ്രീകല, ആര്‍ക്കൈവ്‌സ് വകുപ്പ് ഡയറക്ടര്‍ പി.ബിജു, ചരിത്രരേഖ സര്‍വേ കോ-ഓര്‍ഡിനേറ്റര്‍ ഇ.വി.അനില്‍കുമാര്‍, ഒ.എന്‍.വി.കുറുപ്പിന്റെ ഭാര്യ സരോജിനി, മകന്‍ രാജീവ്, മകള്‍ ഡോ.മായാദേവി തുടങ്ങിയവര്‍ സംസാരിച്ചു.
സംസ്ഥാനത്തെ മുഴുവന്‍ സാക്ഷരതാ പ്രവര്‍ത്തകരുടെയും സേവനം പ്രയോജനപ്പെടുത്തി നടത്തുന്ന സര്‍വേ, ഗ്രാമീണമേഖലയിലടക്കം ചരിത്രശേഷിപ്പുകളുടെ വിവരശേഖരണത്തിന് ഗുണകരമാകുമെന്നാണ് സാക്ഷരതാമിഷന്റെ വിലയിരുത്തല്‍. താളിയോലകളും വട്ടെഴുത്ത് – കോലെഴുത്ത് ലിഖിതങ്ങളുമടക്കം വെളിച്ചം കാണാത്ത നിരവധി ചരിത്രശേഷിപ്പുകള്‍ സ്വകാര്യവ്യക്തികളുടെ നിയന്ത്രണത്തിലുമുണ്ട്. ഇവയെക്കുറിച്ച് കൃത്യമായ വിവരം പുരാരേഖ വകുപ്പിനും ലഭ്യമല്ല.ഇത്തരം ചരിത്രശേഷിപ്പുകളും രേഖകളും സര്‍വേയിലൂടെ കണ്ടെത്തുകയാണ് ലക്ഷ്യം.
വ്യക്തി എന്ന നിലയിലും രണ്ടോ, മൂന്നോ പേര്‍ അടങ്ങുന്ന സംഘം എന്ന നിലയിലുമാണ് സര്‍വേ ടീമുകള്‍ക്ക് രൂപം നല്‍കിയിരിക്കുന്നത്. ഓരോ പഠിതാവും ഒരു രേഖയെങ്കിലും കണ്ടത്തേണ്ടതാണ്. 25 വര്‍ഷമെങ്കിലും പഴക്കമുള്ള ചരിത്രരേഖകളാണ് സര്‍വേയിലൂടെ കണ്ടത്തേണ്ടത്. ചരിത്രരേഖ സര്‍വേയ്ക്കുള്ള ഫോറങ്ങളും ചരിത്രരേഖ എന്തെല്ലാമെന്നുമുള്ള വിവരങ്ങള്‍ സാക്ഷരതാമിഷന്‍ നല്‍കും. കത്തുകള്‍, കൈയെഴുത്തു പ്രതികള്‍, താളിയോലകള്‍, ശാസനങ്ങള്‍, പുസ്തകങ്ങള്‍ തുടങ്ങിയവയാണ് ചരിത്രരേഖകളായി പരിഗണിക്കുന്നത്. ഉദാഹരണമായി ഒന്നാംഘട്ട സാക്ഷരതാപ്രവര്‍ത്തനത്തിന്റെ രേഖകള്‍ പോലുള്ളവയുടെ വിവരങ്ങള്‍. ഭൂതകാലത്തിന്റെ മുദ്രകള്‍ പേറുന്ന ചരിത്രസ്മാരകങ്ങള്‍, സ്റ്റാമ്പുകള്‍, നാണയങ്ങള്‍, കത്തുകള്‍, ആധാരങ്ങള്‍, ജാതകം, പണിയായുധങ്ങള്‍ തുടങ്ങിയവ.
ചരിത്രരേഖ സര്‍വേക്ക് മുന്നോടിയായി ഓരോ തുല്യതാപഠനകേന്ദ്രത്തിലും പഠിതാക്കളുടെ യോഗം ചേര്‍ന്നു. സര്‍വേ ഫോറങ്ങള്‍, മാര്‍ഗനിര്‍ദ്ദേശങ്ങള്‍ എന്നിവ പഠിതാക്കളെ പരിചയപ്പെടുത്തി. ചരിത്രരേഖ സംബന്ധിച്ചുള്ള പ്രാഥമിക വിവരങ്ങള്‍, സൂക്ഷിച്ചിരിക്കുന്ന വ്യക്തിയുടെ പേര്, രേഖയുടെ സവിശേഷത എന്നിവ മാത്രം രേഖപ്പെടുത്തുന്ന വിധമാണ് സര്‍വേ ഫോറങ്ങള്‍ തയ്യാറാക്കിയിരിക്കുന്നത്.
മെയ് 27ന് സര്‍വേ പൂര്‍ത്തിയാക്കും.ജൂണ്‍ 3 മുതല്‍ സര്‍വേ വിവരങ്ങള്‍ പഠനകേന്ദ്രങ്ങളില്‍ ക്രോഡീകരിക്കും. ഓരോ പഠനകേന്ദ്രത്തിലും ചരിത്രരേഖ സര്‍വേ രജിസ്റ്റര്‍ തയാറാക്കി സൂക്ഷിക്കും. ജൂണ്‍ 13ന് ചരിത്രരേഖ സര്‍വേയുടെ സംസ്ഥാനതല റിപ്പോര്‍ട്ട് പുരാരേഖ വകുപ്പിനു കൈമാറാനാണ് സാക്ഷരതാമിഷന്‍ ലക്ഷ്യമിടുന്നത്.
സാമൂഹ്യസാക്ഷരതാ പദ്ധതിയുടെ ഭാഗമായി ജലസാക്ഷരതാക്ലാസ്, ലിംഗസമത്വബോധനം എന്നീ പരിപാടികളും ഈ വര്‍ഷം സാക്ഷരതാമിഷന്റെ നേതൃത്വത്തില്‍ നടത്തുമെന്ന് ഡോ.പി.എസ്.ശ്രീകല പറഞ്ഞു.